🚨 ब्रेकिंग न्यूज 🚨 आंबेगाव तालुक्यात दरोडेखोरांचा कहर; शेतकऱ्याची निर्घृण हत्या, परिसरात भीतीचे सावट पुणे जिल्ह्यातील आंबेगाव तालुक्यातील थोरंदळे येथे घडलेल्या भीषण घटनेने संपूर्ण परिसर हादरून गेला आहे. अज्ञात दरोडेखोरांनी मध्यरात्रीच्या सुमारास गावात धुमाकूळ घालत 62 वर्षीय शेतकरी दामोदर जयराम मिंडे यांची अत्यंत निर्दयी पद्धतीने हत्या केली. या घटनेमुळे गावकऱ्यांमध्ये तीव्र भीती आणि संतापाचे वातावरण निर्माण झाले आहे. मिळालेल्या माहितीनुसार, दरोडेखोरांनी दरोड्याच्या उद्देशाने मिंडे यांच्या घरात जबरदस्तीने प्रवेश केला. यावेळी मिंडे यांनी धाडसाने त्यांना विरोध करण्याचा प्रयत्न केला. मात्र, संतप्त झालेल्या आरोपींनी त्यांच्यावर धारदार शस्त्राने सपासप वार करत गंभीर जखमी केले. या अमानुष हल्ल्यात मिंडे यांचा जागीच मृत्यू झाला. घटनेनंतर आरोपी घटनास्थळावरून फरार झाले. या घटनेची माहिती मिळताच पोलिसांनी तात्काळ घटनास्थळी धाव घेत पंचनामा केला असून तपासाची चक्रे वेगाने फिरू लागली आहेत. आरोपींचा शोध घेण्यासाठी विशेष पथके तयार करण्यात आली असून, परिसरातील सीसीटीव्ही फुटेज, मोबाईल लोकेशन आणि इतर तांत्रिक पुरावे तपासले जात आहेत. या भीषण घटनेमुळे स्थानिक नागरिकांमध्ये प्रचंड संताप व्यक्त होत असून, गावात सुरक्षिततेचा प्रश्न पुन्हा एकदा ऐरणीवर आला आहे. नागरिकांनी पोलिस प्रशासनाकडून कडक कारवाईची मागणी केली असून आरोपींना तातडीने अटक करून कठोर शिक्षा देण्याची मागणी होत आहे. दरम्यान, पोलिसांनी नागरिकांना शांतता राखण्याचे आवाहन करत लवकरच आरोपींना अटक करण्यात येईल, असा विश्वास व्यक्त केला आहे. रिपोर्टर अमर शिवाजी पठारे इंडियन प्रेस यूनियन